早幾日,網上睇到段流傳一排「股場笑話」,內容簡單但就足以令人反思。故事一開始係講緊一間飯館請人,老闆先後接見三位之前分別係炒家、股評家以及散戶應徵者。
個擅於將股價由幾蚊炒到幾十蚊的炒家,既然佢炒功咁了得,所以老闆亦二話不說請佢做飯館大廚;至於終日都度評論以及推介股票股評家,老闆就請佢企門口,專門負責替店舖拉客。但對於個散戶老闆就坦言真係搵唔到有乜適合職位畀佢不過,當事情正在擾攘之際,店舖就發現原來佢當日冇買到肉,所以搞到冇肉賣。
說時遲那時快,散戶經已割下自己一大塊肉,以作店舖應急之用,並拋下一句:「第二種本事我就冇,但係割肉我就經常做,唔信你可以問問佢兩位。」
割肉呢兩個字,唔同時間你可以理解成唔同意思。亦即係話,你鍾意估佢意思係止蝕離場又得,抑或係寓意自己肉隨砧板上,任人宰割都得,歡迎大家任意幻想。
大行估錯 散戶割肉
但近日落到證券行,唔單只經常都聽到股友話「大戶玩晒」、「有佢玩冇你玩」呢字眼,更甚係有股友仲話自己就好似大戶口邊一件點心添。所以當我見到割肉呢兩個字,下意識難免都會認為,似係寓意股友們肉隨砧板上任人宰割多啦。好似早排之嘛,聽股友講,有大行出預測話邊隻會升邊隻會跌,咪就引到唔少缺乏方向散戶死跟,最後更羊群心理下,釀成恐慌性拋售囉。
講真,其實依家市況下,莫講投資者,就連大行佢自己投資表現都未如理想啦。之所以邊個話佢預測就一定準呢?股友們,我割肉止蝕離場經已夠痛,千祈唔好再大戶講乜就全部信晒,變成任人宰割喇,唔通大家真係唔怕流血不止咩?
沒有留言:
發佈留言