商場播世盃 兼送「宿一宵」

大家會唔會去apm 睇波??

世界盃殺到嚟，好多人好似小妹咁冇裝有線，睇無綫亞視只播得四場波，認真唔夠喉。好在今年唔少商場直播世界盃，觀塘 apm不單止送大床睇波，又搵埋人氣爆燈天氣女郎黃婉曼跳出電視箱，喺 apm微博開譠講波，佢仲會親身到商場現場講波，同球迷交換心得，今次可能會吸引一批宅男跨區去觀塘睇波。

第二朝仲有車送返工

小妹噚日行開 apm，見到有個鬼妹喺商場大堂當眾冲凉，好鬼死 sexy，原來係商場宣傳佢哋首創嘅「米芝蓮 8星級宿一宵」服務。商場所屬新鴻基地產租務總經理馮秀炎話，大堂放咗巨型 LED電視屏幕直播 64場賽事，球迷睇波零舍有 fee1，「成個場 150部電視播波，喺廁所都睇到。」
馮秀炎又話，世界盃期間每逢周五、六、日，球迷喺商場內消費滿$3,000，有機會喺商場六樓逾萬呎場地瞓覺、冲凉，同埋享受米芝蓮食肆提供嘅美食，第二朝仲有車送去返工，「嗰三日每日都會有一名幸運兒享受星級服務，佢可以帶埋九個親朋嚟享用。」
大角嘴奧海城都直播世界盃，商場所屬信和集團商場推廣總經理蘇蔡潔蓮噚日同小妹講，下月 11號至 7月 4號期間，喺商場消費最高金額嘅顧客，可以免費入住酒店嘅總統套房。而喺八強賽事期間消費滿$200，就有機會贏取高級客房連翌日雙人早餐。