信邊個?

財經CAREFREE - 順叔
三思思捷(下)
(2011年02月18日)

上回講到，思捷環球(330)係香港股市神話，07年高峰前，10年回報達約百倍，但公司股價長升長有期間，董事局高層，卻急急腳套現減持兼跳船，奇奇怪怪。
任何一間上市公司，如果管理層出現好似思捷咁大變動，基本上可以當佢係一隻新股咁睇，即係冇往績紀錄，亦即係最好唔掂佢。
思捷業務主要喺歐美，但於香港上市，分析員亦絕大多數集中喺香港，有幾多個，試過山長水遠去德國，睇睇思捷新舖去唔去到貨？
思捷俾人印象係透明度高，識得湊分析員同芬佬，大家見佢年年交到數，人人有錢賺，管理層種種難以理解舉動，懶得深究。
唔好理佢男裝女裝衫褲鞋襪德國英國，公司牌面上話俾大家知，有兩大盤業務，一個係零售，一個係批發，所謂「批發」，唔係講緊粗製濫造一大堆底衫俾人散去女人街賣，而係講緊靠一啲分銷商去貨，銷售網絡，好似加盟店咁，唔係思捷自己經營。
唔少人會將思捷，同H&M相提並論，等如將西瓜同個桔比，H&M近年大舉進軍新興市場，全球銷售點，約千幾間，絕大多數係自營店；思捷自己管理專門店，至舊年底，只有1,154間，批發業務網點有幾多？答案係：12,056個，而過去多年來都係每年千幾二千個咁增加。
呢個增長模式，熟口熟面，記唔記得財經茄哩啡舊年寫過一篇《體育戰場》，講到內地運動服裝公司，賣時裝當7-Eleven咁做，分店開到通街都係，牌面增長超勁，但真正財務風險同埋存貨壓力，去晒分銷商同埋加盟店，思捷之前增長模式，幾乎同出一轍。
08年信貸危機之前，批發業務，一直係思捷盈利增長引擎，佔收入六成，一場所謂金融海嘯，好多怪事現形，思捷批發業務生意即刻大跌，至09年6月底年度， 比例跌到約52%，上個財政年度，再下降至46%，至去年12月底的半年，更加跌到四成多少少，思捷連續十幾年收入快速增長神話，就係因為批發業務出事斷 纜。
俾你做管理層，你都識得會講，批發業務收縮，因為策略調整囉，因為想加強公司品牌管理囉，不過，如果將管理層集體跳船，跳船後公司業績又大走樣兩件事放埋一齊，就令人好冇信心。
歐洲業務，佔思捷收入近八成，思捷喺歐洲搵乜嘢分銷商喺批發業務散貨，呢個最重要訊息，從來唔會提及，咁叫透明度高？金融海嘯有冇分銷商打柴，亦冇交代過，思捷盤數是否健康，花幾多時間分析都冇用，因為唔知有幾多奇奇怪怪數口，冚埋喺分銷商層面裡面。
思捷依家由一班歐洲人士管理，同你講進軍神州，早排仲翻兜同華潤創業(291)組合資企業，華創業務出名多元化，即係雜，連華創都啃唔落一嚿豬頭骨，思捷有幾把炮，你話呢。股價殘，永遠唔係買入原因，想買思捷撈底，請三思三思。

馬太論投資 - 郭家耀
派高息 利思捷
(2011年02月18日)

思捷環球(330)公布中期業績後，股價反應正面，一度由上月中的低位，回升約18%。
回顧該股中期業績表現，純利按年下跌21%，至21.4億元，符合市場預期，批發業務收入按季出現回升，為金融海嘯以來首次錄得增長，管理層預期下半年度批發業務將續有改善。
至於公司去年推出6項策略性措施，包括透過重組供應商降低成本、計劃在孟加拉開設採購中心減低運輸成本、以及關閉虧損的分店等，相信短期可抵銷成本上漲壓力。
中國業務方面，期內營業額為14.17億元，佔公司總收入約8%，純利約2.3億元，相信未來貢獻會加快增長。
截至去年底，思捷手頭現金約達73億元，足以應付今年預測約13億元的資本開支，公司派發中期息每股1元，高息對股價亦有支持。目前預測市盈率約12倍，預測股息率接近5%，估值仍低，相信後市仍有反彈空間。
建議投資者可於40元附近吸納，目標價上望44元，倘跌穿37元，應先行止蝕。
至於該股昨日收市報40.8元，跌0.2元，跌幅為0.48%，成交額涉4.52億元。

作者為海通國際證券中國業務部副總裁、證監會持牌人，他本人沒有持有上述股份及相關衍生產品。