poor guy 部舊款samsung lcdtv, 當時賣$8900, 用佐18個月( 因為分期剛剛完), 不知幾好,睇高清sharp到飛起. 雖然唔係idTV, 但係加個機頂盒都係$1000, 仲冇咁易壞. hi-tech野不一定好過舊model. 不過就一定貴o的, 出新model, 買舊model 仲可以平o的。
"黃小姐的新機報銷，但 Samsung卻不肯換機，令她十分勞氣。" 投訴
有壞不換功能搵笨Samsung名浮實虛 2009年12月17日
有讀者見 Samsung最新款的 LED電視機，吹噓超薄機身內置高清機頂盒，遂一擲逾二萬元購買，豈料新機到埗即壞，還被 Samsung大耍拖字訣不肯換機。又有讀者睇中 Samsung電視獨有的睇 YouTube短片功能，但購買後多番嘗試都不能收看。
投訴一 內置高清盒易壞
黃小姐一直使用外置高清機頂盒收看高清節目，近期心思思想換新電視機。她四出格價後，看中 Samsung LED iDTV Series8四十六吋電視機，賣點是其約三厘米超薄機身，「宣傳單張仲話部機內置高清機頂盒，非常慳位。」於是她即付二萬二千五百元購買。
終於等到新機送到，但黃小姐發現電視機不能收看高清節目，「 Samsung負責安裝的師傅話內置的機頂盒壞咗，一定要換。」無計可施下，職員把電視接駁到黃小姐舊有的外置機頂盒頂檔。黃小姐把握十天保證換貨期，要求 Samsung換機。
隔了幾天， Samsung只派職員上門檢查，「服務熱線職員話未換得機住，要俾內部技術人員睇過先換得。」職員檢查後，所得結果和上次無分別，必須換機才能根治問題，職員又謂會白紙黑字紀錄在案，安排公司換機。
黃小姐等足一個星期，仍未見 Samsung上門換機，於是致電查詢，始知換機要求被拒，「職員話上頭唔批，只會幫我安裝放大器，但要我加錢，真係搞笑！要外置咁多配件，我點解要買內置高清機頂盒的電視機呀！」
今年四月推出的 Samsung LED電視機，聲稱比舊款 LCD電視更薄，並內置高清機頂盒。惟過去已有不少本刊讀者和網民批評，這款機經常故障，或是接收高清頻道時畫面出現波紋。
Samsung電視機主打內置高清機頂盒及超薄機身，卻招來不少投訴。
Samsung師傅檢查黃小姐新買的電視後，直言內置高清機頂盒故障，安裝放大器也沒用。（張國慶攝）
求證 職員親口證壞機
上週， Samsung職員到黃小姐家中安裝放大器，記者也在場觀察。職員檢查後斬釘截鐵地說：「係電視內置高清裝置壞咗，接收唔到訊號，都唔關放大器事。」他還解釋放大器只會令高清訊號收得更清晰，如今電視機收不到任何訊號，即使安裝放大器也沒用。他隨後將天線駁到外置機頂盒，便即看到高清頻道。
投訴二 戇居 YouTube功能
六月中，林小姐逛電器鋪時，被 Samsung LCD iDTV Series6電視機吸引，貪其可直接瀏覽 YouTube短片：「單張話部機可以直接睇 YouTube，畫面比起電腦熒幕更加大。」於是她以一萬二千多元買了該系列的三十七吋電視機。
收到新機後，她依足說明書指示，將數據機寬頻線接駁到電視，並按電視遙控器的上網掣，但屏幕卻打出「不能連線」字樣。她以為自己駁錯線，於是致電 Samsung求助，要求職員上門檢查。
「師傅一睇，話我家中的網路供應商係和記寬頻，登入時要輸入密碼，但係 Samsung而家未有咁高解碼技術，所以上唔到網睇 YouTube。佢話要用類似有線寬頻嘅供應商，唔使輸入密碼嘅至得。」聽得林小姐一頭霧水。
林小姐一心想用 Samsung新電視收看 YouTube短片，結果被弄得一頭煙。（林志謙攝）
百老滙職員指 Samsung電視機的 YouTube功能「廢廢哋」，不值得為此購買。
有聲無畫兼爆殼
不能收看 YouTube已令林小姐十分失望，更甚的是，電視用了兩個月便失靈，變得有聲無畫面，「師傅上嚟拆機換底板，但整完依然唔得。」
Samsung於是把電視送返原廠維修，但林小姐收回後，發現外層機殼爆裂，職員只好再搬走執漏，林小姐覺得 Samsung產品兒戲，「佢隔無耐就推出新貨，但技術問題根本未解決晒。」
跟進 獨家 YouTube功能廢
記者三次致電 Samsung熱線，查詢究竟如何在電視機收看 YouTube，但每個職員說法不同，一時說與網絡供應商無關，一時又指要額外買路由器（俗稱 Router），但全與裝機師傅的解釋截然不同。記者再到豐澤和百老滙查詢，銷售員皆指直駁 YouTube功能是 Samsung獨有，使用任何網絡供應商皆可，可見資訊相當混亂。
就算真的接駁到 YouTube，原來這款電視機只可觀看 YouTube的十條精選短片，不能隨意搜尋其他短片。 Samsung職員說：「電視機無搜索功能，只可以睇到 YouTube網站最多人睇的十條片。」百老滙職員更直言該功能實際上「廢廢哋」，「如果你想在更大的畫面睇 YouTube，不如直接將電腦線駁到電視，屏幕當電腦用，使咩搞咁多嘢。」
專家話 機身越薄越快壞
新款電視機吹捧機身越薄越好，但鄭家偉反指機身越薄，反而縮短內置高清機頂盒壽命。
理大電機工程學系教授鄭家偉指出，機身越薄，其內置功能越容易故障，「機身越細，內置機頂盒喺有限空間長期使用，零件受熱程度更高，會好快損壞。」相比外置機頂盒，內置的平均早一至兩年壞機。
回應 講大話稱已批准換機
本刊將黃小姐的投訴轉介至 Samsung，發言人原先謂已安排換機，只因缺貨而延誤，但記者即時質問既然安排換機，又何以叫職員上門安裝放大器多此一舉，對方即轉軚改口風：「原來你都喺度，可能之前的資料有甩漏，我唔肯定。」隨即草草收線。翌日， Samsung即急急腳派人上門換機。
至於林小姐的投訴， Samsung承認現惟獨有線寬頻用戶可直駁寬頻線看 YouTube，其餘用戶要加錢買路由器才可觀看。（廖慧英）
壹判官
Samsung急就章推出新產品，但品質卻令人質疑，真是買不過。
評分：劣劣劣劣劣（五個劣為最嚴重）
爆料： 2990 8999
傳真： 2623 9547
絕對保密
電郵： mailto:social@nextmedia.com
沒有留言:
發佈留言