上廣州記住坐直通車

要坐火車上廣州

2009年08月04日
午飯時份，聽古仔聽到幾乎食唔落飯。其一係行蹤遍及大中華嘅行銷 T，自廣州雲遊到港，次日飛台北，跟住返嚟香港又飛上海，似乎日日上飛機咁款。不過今時今日，本地華人仍可以做甚麼乜乜公司嘅大中華地區總裁/主管之類，再過五至十年，呢啲職位十居其九會畀咗內地海歸派攞晒，香港人做阿二阿三啦。行銷 T話李小加出任港交所總裁，是否適當人選並不重要，雖然有投資銀行界人士話佢不適合，但重要嘅係李小加代表一種新趨勢，代表港交所董事會嘅思考轉移，即係現在係時候搵一位內地人嚟做呢個位嘞，一位獵頭界人士話，李小加收到第一個電話之時，佢自己都覺得有啲愕然喎。

行銷 T話：「跟住講個壞消息畀你哋聽。」聽完，大家都面青，承諾以後上廣州只會搭直通車。行銷 T有一位朋友在廣州有份兼職，每星期上去兩日。最近呢位朋友 X貪方便，想慳錢，在深圳坐泥鯭的士上廣州，同行者（互不相識）有一位印度人，一位西方人，中途印度人先落車，再行十分鐘，西方人落車，的士就快到廣州嘞，突然在路口停低，跟住有三名大漢撲出嚟上車打劫，的士駛向一個偏僻的地方，司機落車打開行李箱，三名大漢將朋友 X綁手綁腳，攞佢個荷包，拿出信用卡與提款卡，打佢幾槌心口，逼供提款卡密碼，朋友話唔記得，再捱多幾槌。唯有講啦，之後賊佬以膠布封佢口，丟落行李箱，箱內有火水一桶，的士司機揸車而去將朋友 X藏在一間村屋，先知道司機原來係同謀。兩日後，賊人將朋友 X車返廣州某條後巷，將佢放低，揚長而去，朋友 X幾經辛苦，搵到兼職公司嘅老闆。老闆搵啲江湖大佬問吓，得到嘅回覆係：「執番條命，算佢好運囉，行規係綁兩日，提款幾萬銀就放人嘅嘞。冇錢嘅話，就點着車內火水，連人帶車燒光燒淨。架的士係偷返嚟嘅！」報公安又點？老闆知道冇用，叫朋友 X快啲返香港治療身體。行銷 T話去探過朋友 X，見佢頭腫面瘀心口痛，自己都好驚！


（左丁山）