灣仔狗公園半日遊

灣仔狗公園，係少數康文處可以俾狗入既公園，我將架車泊係灣仔泳池個停車場，收費唔算貴，頭兩個鐘，每個鐘都只係十二蚊。

一落車，已經見到有其他狗友係度泊車，由於我未去過，所以一於跟住佢地行。

行左一陣，終於到公園。個公園比我想像中好，設施都有精心考慮過，包括一條有蓋長石壆，可以俾人坐低休息；每隔大約二十公尺就有一條水喉，可以俾你清潔同俾狗狗飲水；又有膠袋供應，俾你清理狗狗既便便，呢樣最好，我手頭上啱啱用晒報紙，所以我即時攞返個，因為明知個衰仔一定會再痾。

話口未完，隻狗已經紮起個「痾屎馬」…… 好彩我攞左膠袋，如果唔係，真係要用手接。

講番公園入面有草地，又有混凝土地，最特別之處係有用木板砌既地，等夏天d狗狗唔使咁「辣腳」。

不過有兩樣野係我覺得有問題:
第一就係近海邊既欄杆，同地下距離太闊，d狗主如果拋波時，一個唔小心，個波好易碌落海；
第二就係附近無野食賣，好多人都係買定野食黎，呢樣我下次會醒目.

大家仲知唔知道其他方便的放狗地點呢? 有就大家可以分享下呢! ^^