爽人物：20歲 i 字炒家日賺40萬

iPhone 4S炒風不再，但對於20歲的阿Ken來說，每日都是炒機日。他是旺角先達廣場最年輕i字（iPhone、iPad）炒家，四個月前，原本在專業進修學院讀工商管理的他，寧願停學，都要進駐先達三樓開手機店；4S開售時，試過日賺40萬，「來得先達，邊個唔想搵快錢？」熱潮過後，每月捱二萬月租，阿Ken冇有怕。

一大堆現金在枱面，阿Ken卻淡然說冇晒感覺。

旺角先達，是手機炒賣的集散地，商場只有三層，手機店佔了大半，阿Ken開的「瑪亞科技」，位於三樓。
「iPhone 4S，仲收唔收？」有人拿著手機問價，正在數錢的阿Ken，二話不說就問幾多部，有殺錯，無放過！「頭一浸最好賺，每部執至少六、七百，依家每部4S執一、二百，好在我哋量多，一日幾百部上落，密食當三番。」阿Ken是先達「新手」，四個月前進駐，「呢度有十幾個批發商，要做到大生意，唔喺呢度插旗唔得！」


「收買佬」專做內地生意

讀書時代，阿Ken和很多同學一樣，排隊做小買賣，「嗰時喺荃灣幫阿婆收咗兩部iPad，賺咗一千，嗰心紅晒。嗰時只有一、兩萬積蓄，加埋簽咗三、四萬咭數，諗住本多啲，賺多啲！」他後來索性轉做「收買佬」，以日租五百元成本，租用客貨車在旺角街頭收機，專攻iPad、iPhone，又在網上討論區留言，公開聯絡電話，甚至內地手機號碼，擺明做內地人生意。
「我八成客都係內地人，佢哋隨身至少都有一百幾十萬cash」。採訪當日，就有大堆「金牛」堆在枱面。記者見到嘩然，他就淡淡然說：「做耐咗，冇晒感覺。」
炒賣致富，不單是先達精神，怕且還是香港精神吧？「等iPhone 5出，就可以再大炒！」信心十足的阿Ken說。