慳錢勿怕煩

幾百文都幾小兒科下.

撰文:活力先生
欄名:關人馬事

二○一二年，汝曾被警告，兵凶戰危，大家準備勒實褲頭，學習咬緊牙關過寒冬。

八十年代，我阿活正值黃金年代，心態及實質上皆明天會更好。移民加拿大，覺得當地人非常 cheap，竟然十之八九公餘掛住剪 coupon，又日日夜夜猛吼超市及大公司減價，部署瘋狂掃貨，儲於屋內慢慢用。

隨着年紀漸長，小弟開始領略，一個國家、一個城市、一間公司，以至一個家庭一個人，皆花無百日紅。故此，中學時所唸兩句，日日浮現腦海 —— 常將有日思無日、莫待無時思有時。

小弟學習石鏡泉老師，早已返璞歸真，戒掉無謂及炫耀式消費（嘻嘻，我倆皆唔使靠咁而曬也！）實行最慳錢生活模式。

講明，學習慳錢，並不等於唔掂，而係：第一、令自己活在安全綫上；第二、有剩，捐出去幫人更好。

慳錢之道包括：

一、剪 coupon —— 係呀，以前我笑人，如今自己親手做。剪張 coupon，早餐慳兩蚊，正！

二、晚上七點鐘買餸 —— 收檔前，所有魚肉菜檔必定大傾銷，平正常價三分之一！

三、戰勝超市 —— 熟讀所有必需品價格，只於大減價時入貨，平時靜如止水。呢方面，我最精於研究啤酒、汽水、紅酒價格變動。

做齊上述三點，每月少支出幾百蚊計。

記住，慳錢一定比較煩，執生啦！