中電改派息安排 股息早啲落袋

中電改派息安排 股息早啲落袋
2011年1月8日
【明報專訊】錢呢樣嘢，永遠盡早落袋最開心，中電(0002)亦深明呢種人性本質，專登改一改公司的派息安排，等一眾股東可以提早1個月收到末期息。

中電一向季季派息，包括3次中期息同1次末期息，甚得股東歡心，但中電似乎認為「今時今日呢種服務態度仲未夠好」，專登優化派息安排，話以後會維持一年派4次息，但「末期息」會改埋做「中期息」。「末期息」同「中期息」都係派息啫，又無話「末期息」一定要派得多過「中期息」，咁改做「中期息」又有乜好處呢？

只派中期息 唔使等股東會

原來玄機在於「末期息」一定要開埋股東會先派得，即係要等到4月尾，但改做派「中期息」嘅話，就可以提早响3月底派第4次股息，咁股東就可以提早1個月有錢落袋。其實呢種派息安排，匯控(0005)同恒生(0011)等大藍籌已經一早做緊，並唔算稀奇。