消費 blog：稻香有優惠食$100送$50

消費 blog：稻香有優惠食$100送$50

母親節越嚟越近，啲食肆開始出招搶客。好似最近翻叮「一蚊雞」優惠嘅稻香集團又有新搞作，集團企業傳訊部嘅 Karen姐噚日打畀小妹話，佢哋破天荒推出晚巿食滿 100蚊送 50蚊現金券嘅母親節優惠。聽落好似幾筍？變相半價喎。

可累積 6張同時用
Karen話，顧客即日至 30日晚巿期間，惠顧稻香集團旗下食肆包括稻香、稻坊、稻香超級漁港、迎囍大酒樓、潮樓/潮館、客家好棧、上樓及 HIPOT（不包括 HITEA、燒一流及鍾菜），消費滿 100蚊或以上，無論金額幾多，埋單嘅電腦收據都可以當一張 50蚊現金券用。不過，呢啲現金券要喺下月 1日至 14日期間再光顧稻香晚巿先用得，一次過最多累積 6張現金券（即 300蚊）同時使用。

餐飲聯業協會會長黃家和話，稻香呢個優惠一石二鳥，因復活節過後飲食業比較靜，下月五一黃金周內地假期又短咗，預計少咗內地客嚟香港消費，稻香呢一招可以吸引啲客 4月同 5月都要幫襯佢哋，加上食$100送$50都幾吸引人，「最好係一次過可以用 6張現金券。」黃家和又說，「我啱啱食完飯，間酒樓都送張 100蚊優惠券，但要食滿 400蚊先用得，冇稻香咁抵。」電郵： mailto:shoppingjing@appledaily.com