以後去element, 唔使崖貴野食!!
大快活今進駐圓方
ICC白領一族叫好 2009年5月27日
【明報專訊】小琴早排同一位喺九龍站ICC返工嘅美資大型投行老友午膳，講起佢哋由中環搬過九龍之後嘅感覺如何。老友話，最唔慣嘅係食飯嘅選擇少咗好多，事關ICC下面嘅商場圓方(Elements)食肆唔多，而且消費頗高，價錢大眾化嘅快餐店欠奉。
不過，小琴呢位老友嘅煩惱，或者快將可以解決，事關快餐連鎖店大快活(0052)今日將宣布正式進駐圓方，成為首間進駐圓方嘅大型快餐連鎖店。小琴噚日立即通知呢位ICC老友。佢第一個反應係﹕「真的嗎！」唔使講，佢當然拍晒手掌喇。
唔搞「高級版大快活」
圓方大快活，位於The Rink溜冰場側邊，據講，前身喺一間三文治店，大快活將開設一間半開放式嘅分店，可以坐到50至60個人。小琴好奇，圓方嘅租金一定唔平，大快活點解要入去捱貴租？係咪要提供非傳統嘅菜單，搞個「高級版大快活」，有關方面話唔會，圓方嘅大快活菜單仍然係用依家嘅菜單。咁點解大快活肯入去，圓方又何解要引入大快活？咁就要等今日嘅記招上，由公司管理層講解一吓。
講開又開，有一間平價快餐店，對ICC返工嘅人實在係好事，老友話﹕「依家喺圓方食嘢，至少都要50、60蚊，如果要好啲，可以坐定定食，起碼要100蚊以上先可落樓，而且來來去去都係得嗰幾間選擇。」
因此，老友話，佢哋好多時都會坐一站港鐵到奧運站商場食嘢，或者坐的士或小巴去佐敦搵嘢食，唔熟地頭既老外同事，更加會坐港鐵返中環，搵自已熟悉嘅地方食嘢。總之講飲食，中環區之方便及選擇之多，始終遠勝九龍站。
報料電郵﹕piano@mingpao.com
我就唔係好認同最後句說話, D白領霎時間搬office去到一笪陌生地方當然唔適應, 而且仲要係自成一角不假外求嗰種呢! 但你要諗下中環商業中心區密度幾咁高, 一到食晏鐘數就成街都係白領排長龍迫晒出行人路, 相反九龍站只得伶伶仃仃一幢ICC, 而圓方商場少人行得嚟又多食肆選擇(唔識搵,我教你上openrice search下都有成40間,每日試一間都有排你試), 所以我覺得 "搵食" 係一定易過喺中環.
回覆刪除我諗佢地所講嘅 "來來去去得幾間" 係價錢同口味問題啦, 因為佢地喺圓方搵唔番中環嗰種風味, 例如路邊茶餐廳, 各式快餐店, 平民化餐廳, 仲有大排檔呢! 文章話有D甚至專登過海返中環搵食, 呢樣我都會理解, 始終喺中環生活過, 點都會有一份 "情意結" 架.
不過其實我都早估到圓方會 "向現實低頭" 喇, 為ICC白領也為商場顧客, 一個場始終都要有D價錢比較大眾化嘅食肆充撐下, 先至吸引到多D人嚟行, 唔會成日比人感覺到個場懶係扮高檔咁淨係serve班中產嘛