搜尋此網誌

大家樂叫少飯可做善事

好有意義既活動: pghk 一定支持 快餐跟的白飯一向份量多,一個人跟本食唔曬。

大家樂叫少飯可做善事 每叫1次 1元贈食物銀行

依家若果你去到大家樂幫襯,向收銀姐姐講﹕「唔該,少 飯!」咁你可能不知不覺已經做咗善事。事關大家樂正試推一個「少飯捐一蚊」嘅食物捐助活動,意思係食客到大家樂買嘢食,喺收銀機處買飛時表示要一碗分量少 啲嘅飯(焗飯類除外),大家樂就會相應向聖公會嘅「恩澤膳」食物銀行,捐出價值1蚊嘅食物券。

其實,呢個活動正名係「280C愛心」行動,意思取自一碗大約有280卡路里(Calories),而「C」與「施」同音,代表以此行動施予愛心咁解。據朋友話,大家樂有140多間分店,依家喺其中約6間試驗緊呢個活動。

大家樂咁做係咪要客人食少啲飯,自己搵着數?當然唔係,真正出發點係依家好多人都食剩大半碟飯,最終只係掃入垃圾桶,認真浪費。雖然大家樂已同生化公司合作,將垃圾食物用作有機肥料,但係亦希望推廣一個全民飲食運動,讓香港市民更關注浪費食物嘅問題。

而且,為咗推行呢個活動,大家樂相應要付出額外嘅行政費用,包括收費機軟件更新、員工培訓、宣傳製作費及善款等支出。當然,大家樂亦有好處,例如垃圾食物少咗,員工處置嘅時間減少,效益會提高。

6間分店已先作試點

小琴朋友話,依家試驗緊嘅6間分店,已掛咗標示,提醒食客可以提出少飯,但好多食客都唔多覺眼,故要服務員口頭提醒。據了解,大家樂於4月20日至5月31日,會將行動推廣至全線分店,到時大家樂員工,將會配戴特別製造嘅「少飯」襟章,提醒顧客支持「少飯」行動。

沒有留言: